Հստակեցրու նպատակդ՝ հասկանալու՝ ինչի համար ես սովորում

Հաճախ մենք որոշում ենք նոր բան սովորել առանց հստակ մտքում ունենալու՝ ինչի ենք ուզում հասնել։ Իսկ եթե չես հասկանում՝ ինչու ես դա անում, ուղեղդ կփորձի քեզ շեղել՝ առաջարկելով այլ «ավելի օգտակար» կամ հաճելի գործեր։ Որպեսզի սովորելը չդառնա կիսատ մնացող հերթական նախաձեռնություն, առաջին քայլն է՝ հասկանալ, թե այդ հմտությունը ինչպես կարող է օգնել քեզ կյանքում։ Օրինակ՝ եթե ուզում ես սովորել օտար լեզու, մտածիր՝ դա ինչ հնարավորություն կբացի քեզ համար։ Գուցե կարողանաս աշխատել միջազգային կազմակերպությունում, ազատ շփվել ճանապարհորդելիս կամ ուղղակի վստահ զգալ քեզ նոր միջավայրում։ Երբ վերջանպատակը հնարավոր է պատկերացնել, սովորելն ավելի մոտիվացնող է դառնում։ Անընդհատ հիշիր նպատակիդ մասին՝ հատկապես երբ կորցնես առաջ շարժվելու ցանկությունդ: